नेकपा एमालेका महासचिव ईश्वर पोखरेल काठमाडौंबाट चौथोपटक चुनावी प्रतिस्पर्धामा छन् । ०५६ मा साबिक काठमाडौं ३ बाट सांसद निर्वाचित भएका पोखरेल हालको काठमाडौं ५ बाट ०६४ र ०७० मा दुवैपटक कांग्रेसका नरहरी आचार्यसँग पराजित भए ।

०४८ सालको संसदीय चुनावमा धनुषा ३ बाट पराजित भएका पोखरेल ०५१ मा तत्कालीन प्रधानमन्त्री मनमोहन अधिकारीको प्रमुख राजनीतिक सल्लाहकार बने । तत्कालीन नेकपा माले र हालैको एमालेका संस्थापक नेता पोखरेल एकपटक राष्ट्रियसभाको सदस्य पनि बनेका थिए ।

पञ्चायतकालभरि भूमिगत राजनीति गर्दै पाटीको केन्द्रीय नेतृत्वमा रहेका पोखरेल दुईपटक एमालेको महासचिव भइसकेका छन् । एकपटक आपूर्ति मन्त्री र दोस्रोपटक छोटो समयका लागि उपप्रधानमन्त्री र परराष्ट्रमन्त्री बनेका पोखरेल एमाले र माओवादीको पार्टी एकीकरण संयोजन समितिको सदस्य समेत छन् । पोखरेल सेना समायोजन विशेष समितिको सदस्यसमेत थिए ।

ओखलढुंगाको मांखामा जन्मिएका पोखरेल हाल काठमाडौंकै टोखा नगरपालिकाका स्थायी बासिन्दा हुन् । पोखरेल सेना समायोजन विशेष समितिको सदस्यसमेत थिए ।

एमालेमा शीर्ष नेता भइकन पनि संविधानसभामा पराजित भएका कारण पोखरेलले राष्ट्रिय राजनीतिमा धेरै ठूलो भूमिका खेल्न पाएका छैनन् । एमालेको आगामी महाधिवेशनमा केन्द्रीय अध्यक्षकै दाबी गर्दै आएका पोखरेलको यसपटकको जित वा हारले उनको राजनीतिक जीवनमा निकै ठूलो अर्थ बोकेको छ ।